قصيدة من يلمحك للشاعر/أحمد جلنقة باللهجة المحكية

للشاعر/ أحمد جلنقة
( من يلمحك )

من يلمحك يعرف انك ليبية...
وانك شموخ الصحراء..
وانك الشاطي والنسيم..
والوشم ف جبينك لوحة..
واحة ف حضن ارمال..
من يلمحك انتي..
ما تفارقة البسمة..
ويسكن الشعر ويسكنه..
ويقول فيك كلام..
فيضة حنان وعشق..
والوصف فيك ايحير.
ان قالو قمر..؟
لو يقربو منه..
ويش القمر يالاك..؟
وان قالو غزال..؟
الكل شافه معاي..
شن جاب من لونك..؟
وان قالو زهور ولا اورود..
في عطرها في لونها..
ان ملتي اتميل معاك..
في هالفضاء الوسيع..

ضنك سحابة ماطرة..؟
ولا اشميسة دافية..؟
من يلمحك انتي..
يحتار من يختار..
من شرقها من غربها..؟
ف شمالها ف جنوبها..؟
كل المدائن ليبيا..
والعشق لليبية...

حناطة / شعر /أحمد جلنقة

حناطة
نازلة تمشي بسلاسة..
تروي ف الناس العطاشة..
رمشها غيمة الخير..
وعينها همسة الليل..
بس هي زادت بشاشة..
وين تمشي..
بس تمشي..
الكون اعمه السكون..
غير تك..
تك تك لا متسمع..
تعتقد إنها رسالة..
ف جوالك تخدعك..
ولا فوحة عطرها..
وين تحضن ها لنسيم..
وانت ماشي..
وانت قاعد..
تعرف انها خطمت..
وتعرف إنها هي الحياة..
سنفونية كاملة..
فيها معزوفة الريح..
وفيها معزوفة مطر..
وفيها معزوفة الحب..
ما عزفها ياني..
ولا كتبها شكسبير..
ولا ديانا فاح منها هالعبير..
من غيرها..
أم العيون الناعسة..
أم الخطاوي الراسخة..
العفيفة الطاهرة..
بنت الوطن...
من غيرها..؟
السمراء..
الي وين تمشي..
تضحك..
الارض وسماهاء..
وين تضحك..
نار ترقاء مع حشاك..
ترجعك ليام صباك..
حتى لو شابت الحاك..
وتعرف انه مستحيل..
غيرها يبقى غلاك..

شعر /أحمد جلنقة

قصيدة/افيون المشاعر

قصيدة/افيون المشاعر
تأمل في معاني الحب..
يِْش معنا الغلاء...؟
شذا فواح ....ولا ؟
أريج افوح....ولا ؟
مشاعر في بعضها تذوب..
دمعات كيف السراب تبان..!
تحكي عن غلاء وأشواق..
ولا زعم يْش كون ..؟
زعم له طعم ..؟
وكيف ينعشك طعمة..؟
واللون عنده لون ..؟
وكيف بيبهرك لونه..؟
جمال هوا ..؟
ولا عيون منقوشة بمرود عود ؟
ولا أفيون ..؟
يْخذرفي مشاعرناء..
كما الطيب كما القاسي..
آو بين احمر وبين زهري..
يْولي لونها لخدود..
صنارات مطعومة ..
نجملها..
نلمعها..
ونرميها ف سكون الحب..
تجي في فم حورية ..
اومرات يلتهمها حوت..
زعم هكي الحب كون يا آدم .. ؟
زعم هكي يا سحر الكون يا حواء..؟
ولو مني الحب هكي بلاش اكون..

قصائد بالمحكية الليبية

الخاطر
خيرك معاي يا خاطري ..؟
درتلي مشغال..
انت ونيسي في وحدتي ..
وانت الغريق الي ردم لسرار..
فيك العسل والمر ..
وفيك الجرح..
وفيك الدوا..

وفيك يا ما فيك..
فيك من حكاوي امي..
الحنونة..
بصوتها الدافي..
خرافة ورا خرافة..
ونار شاهينا..
وطاسة بعد طاسة..
والليل غاطينا..
انزيد الحطب لنار..
والنار مايغباك..
وبرادنا يجلب ..
والليل يطوي في صفحتة..
ونقول لو يطول شوي..
لين نشرب الطاسة..
وتكمل الخرافة..
حسيت بمي تختصر..
بعد لمحت عيوني عسلاً..
وكملت الخرافة..
وبانن جدايلها..
وتاقت بعد تغييب..
تعلن ليوم جديد..
وفيك ياما فيك..
فيك من طبعه القاسي..
وفيك من صمته..
وفيك من حرارة عيونه شوي..
وفيك المحبة..
وهو للمحبة زاد..
وين ماتنده على يا خاطري..
يخطر على..
تخطر على هيبته..
في كل ميعاد..
وتخطر علي ضحكته..
في فجر لعياد..
وتخطر على مشيته..
للناس عياد..
وتخطر على وقفته..
بالناس شرهاب..
ويخطر على..
نطلب الله يغفر ذنوبه ويرحمه..
وخطر على يا خاطري ديمة..
خطر على باتي..

شعر / أحمد الجلنقة